彰化縣台語演講比賽第二名得獎者演講稿

食按頓的時陣

東芳國小黃美雲

腹肚枵枵，腹肚腹肚枵-------“， 阿母喔！飯是煮好袂？

講到食晚頓，是阮上快樂的時陣，若鼻著灶腳阿母煮菜陣陣的芳味，阮的腹肚就開始大腸告小腸，吱吱咕咕唱歌唱未離，緊喔，緊喔，較緊洗手來準備。

哇！歸桌頂的菜，有阿爸愛吃的三杯鷄，有阿母愛吃的炊鱈魚，阿兄愛食的金針菇炒木耳，猶擱有阮上愛食的香菇魷魚羮，真正是腥臊祿祿哦！阮趕緊鬥腳手來擺碗筷，趁無人注意，偷偷拿一塊鷄肉塞落去嘴裏底，哎喲！燒喲！燙嘴箍！毋擱滋味實在香擱甜，有夠讚。阿兄趕來鬥添飯，等候阿公、阿嬤、阿爸、阿母上桌，準備作伙來吃飯。

大家坐好勢，阮阿爸攏會先帶大家來唸彼首”感謝”：感謝天，感謝地，感謝阿娘及老爸，感謝恁所賜的一切。感謝你，感謝伊，感謝每一個人，每一個日子，互我平平安安，歡歡喜喜。感謝天，感謝地，感謝萬物，無論大及細，感謝天地的一切。感恩喔！阿爸教阮著感謝真濟無熟識的人對咱的付出。真正是感恩喔！

食無二三嘴，阮阿母著開始共伊日時頭仔，過家過厝相揣坐所聽來的，一件一件搬搬出來講。啥物人in(亻因)兜生後生，什麼人in(亻因)厝貓仔出世，食暗頓的時陣伊就會報告，伊是阮兜的放送頭，毋通看伊愛開講哦，若是厝內面的大細項工課伊攏發落甲真好勢真舒適哦！揣無人會凍共伊比。猶擱有伊煮e菜，毋管是青菜豆腐抑是豬跤滷蛋，食起來的口味攏是世界無塊比的料理。阮阿母講，伊煮的菜這呢好食，是因為伊攏有謲參真濟真濟的愛落去調味，是別人兜無塊食的喔！著按呢阮歸傢伙仔..老歲仔好心命，少年的誠勇健。

阿母講煞，阿嬷叫阮趕緊食，因為小等咧伊欲看歌仔戲。”我身騎白馬走三關，改換素衣回中原------“阿媽唱兩句，聽起來擱不只仔有板，架勢十足，擱未輸彼咧楊麗花。阿嬤講伊是小漢欠栽培，阿若無不是生就是旦-------緊食！緊食！阿公和阿爸嘛會來開講，論古說今攏總有，無論是古早古早盤古開天，亦是這馬扁宋會，326大遊行、印尼大地震，若是慢來食飯就减聽一半真無彩

阮若聽擱趕緊打拼食，三喙做兩會扒，三杯鷄一目睨ㄚ就碎骨分屍，炊鱈魚干但存破布籽，香菇魷魚羹早就”通通跑到我的肚子裡”，呀若金針菇炒木耳連盤仔攏予阿兄舔甲金熠熠，阿母看了就真歡喜，呵咾伊家己，”誰人甲我比”。

食暗頓e食陣，是阮這家伙上快樂e食陣，阮佇遮邀請大家有閒來阮兜作伙食晚頓喔。多謝逐家。