彰化縣台語演講比賽第二名(初賽)演講稿

阮兜的人

東芳國小黃美雲

大家好，我今仔日要講的題目是：阮兜的人

阮兜有六个人，有三隻豬，獪誤會喔，是三代攏有人肖豬，阿公、阿爸、我，是不是真罕見咧！當然全家上寵倖的人就是我這个豬仔囝。

來喔，即嘛先紹介阮阿公互恁大家熟識。阿公是一個真趣味的人，逐工都笑嘻嘻，歸工無代誌佇外面走扒扒四介踅，不是去看人嘩玲瓏賣雜細，嘛不是打拳頭賣膏藥。阿公是去厝邊頭尾開講破讀泡茶，講天說地論時勢，生活一點兒嘛袂無聊。

煞落來，阮阿嬤呢？逐工透早就認真去運動埕剖西瓜，一半送予你、一半送予給伊咧打太極拳，運動轉來，就開始抺粉點胭脂妝水水，打開電視機，茭腳看股市，若是紅的，他就笑咪咪，若是青的，他就會唸：「夭壽喔，了錢喔！股票不使買喔！」歸工啐啐念，煩惱甲暗時睏袂去。有一工阿嬤又擱咧念的時陣我就共伊講：慢且，我來替妳唸：「啐啐唸，啐啐唸，唸孫飯粒黑白黏。啐啐唸，啐啐唸，唸子賺錢不曉儉。唸新婦煮菜毋夠鹹，唸老尪那會這呢惦。啐啐唸，啐啐唸，唸歸工，攏不累。」阿嬤聽了笑甲喙呀離腮腮，以後就無擱唸阿。

講到阮阿爸真辛苦，逐工天未光就出門，日頭落山才有入門，伊有講：做雞就慶，做人就翻。定定教阮做人的道理，伊擱說：予阮兜幸福的生活是伊這世人上大的責任。所以毋但著愛打拼賺錢，有閒伊也會開車率大家四界去chit4 tho5人講做牛著拖，做人著磨，若阮阿爸是磨到有夠功夫。

擱來說阮老母，伊是一個標準的家庭主婦，有多標準呢？就是阿爸若佇厝，伊就乖甲親像一隻老鼠仔同款，阮阿爸啊若前跤踏出門，伊後跤就綴出去囉！買菜一買就一早起，開講較濟過做代誌。什麼人in(亻因)兜生後生，什麼人  in(亻因)兜貓仔出世，食暗頓的時陣攏會全部搬搬出來講，伊真正是阮兜的放送頭。毋過──毋通看伊愛開講哦，若是厝內底的大細項工課，伊攏發落甲真好勢真舒適哦！揣無人會凍共伊比。亦擱有，伊煮的菜，不管是青菜豆腐抑是豬跤滷蛋，食起來的口味攏是世界無塊比的料理。阮阿母講，伊煮的菜這呢好食，是因為伊攏有參真濟真濟的愛落去調味，是別人兜無塊食喔！就按呢共阮歸傢伙仔飼甲老歲仔好心命，少年的誠勇健。

阮兜是一個鬧熱、心適、快樂的家庭，阮上愛阮兜的人，歡迎大家有閒來阮兜開講泡茶。多謝大家。