台語文學創作比賽教師組第三名    東芳國小黃美雲

　 卦山寄情

   恬恬坐佇銀橋跤已經有一睏啊，眼前的溪水，親像歲月的河仝款，勻勻仔流。流過阮阿媽曾經佇遮洗衫的影隻，流過阿母細漢時陣走空 襲覕防空hô的背影，嘛流過阮少女時代佮同窗踮這條溪(辶日)迌、烘肉的形影。往事像電影一幕一幕佇目睭前放送。阮拍開記持的窗，款款仔回想，講予坐佇身軀邊的後生聽。

  樹頂鳥仔啾啾的歌聲猶原遐爾好聽，銀橋飛瀑的水流聲陪伴阮母仔囝延路那唱那行。無疑故，樹ue雄雄跳出一隻膨鼠，伊連鞭懸連鞭低實在誠古錐，會當看著這難得、精彩的畫面，真正是福氣啦！無偌久的時間，來到文學步道，微微的風吹來桂花的芳味，濛濛仔雨加添浪漫景緻，路邊花蕊恬恬仔開，阮跤步放予慢，沓沓欣賞著逐首又閣媠又閣優雅的詩。就按呢，佇充滿詩情畫意的八卦山頂，雙人手牽手，對大佛的方向行去。

    「阿母啊！你嘛較拜託咧，一日到暗聽你講欲減肥，哪會四秀仔閣買一堆，若變做大箍呆，莫怪我無共你提醒。」阮囝看我鰇魚絲、鳥梨仔糖、燒酒螺、鳥仔蛋…逐項買tsiâu到，笑笑共阮酸幾句啊。「講予你捌，喙鬚著好拍結？」「來到九龍池若無食遮的物件，就無我囡仔時陣八卦山的氣味。Khi-moo-tsih你捌無？」話講到遮，一个無張持，阮閣後生行入記持的走廊……。阿爸大粒汗小粒汗喘甲若牛，騎著伊老khok khok發出inn inn uainn uainn聲音的鐵馬載阮。逐擺若經過中山堂邊紅毛井，就停落來歇睏納涼，順紲啉甘甜的井水。煞落來才閣載阮去八卦山跤的花鐘遐囥鐵馬。見那山的時陣，伊就那牽阮的手，那教阮唱moo moo thà lóo sàng佮足濟足濟的日本囡仔歌。爸仔囝歡喜的笑聲佮快樂的歌聲響亮四邊。行到九龍池，毋免阮開喙，上疼我的阿爸就鳥梨仔糖、鰇魚絲、燒酒螺、鳥仔蛋…買買規大堆。阮快樂的囡仔時無人有塊比。

啊！薟！薟！薟！阮予燒酒螺薟醒，目油流袂離嚨喉liong-liong欲束去，甘苦到勼咧塗跤邊。那知一目睨，阮囝煞無去。「阿母！較緊較緊！趕緊食落去。」原來貼心的後生看我薟著，隨趕緊走去買枝仔冰予阮食，實在是足甘心e。

  來到大佛前，雨已經停啊，兩爿二隻大石獅猶原踮遐笑眯眯。阮牽著後生的手，徛踮彼當時阿爸阮拜佛的位置。仝款的心情，仝款的所在，大佛永遠坐挺挺，伊毋若見證阮兜四代的卦山情，嘛見證所有彰化人世世代代對八卦山感情的傳承。耳孔邊傳來莊嚴的鐘鼓聲，阮用恭敬的心，雙手合掌，祈求大佛保庇咱台灣國泰民安、風調雨順；保庇咱彰化人平安順適、萬事如意！閣一擺至誠心頂禮，求大佛替阮傳情意，ǹg望阮過身的序大人，會當收到今仔日阮佇八卦山頂對in(亻因)懷念、思親的感情。阿爸！阿母！查某囝足想足想恁e。