快樂學台語　歡喜笑微微    東芳國小黃美雲

　　從足濟人攏真好奇，閩南語課到底是咧教啥物貨？定定有家長來揣阮開講，足煩惱家己的囡仔閩南語講袂好細，上課个時陣甘會鴨仔聽雷聽攏無？

　　阮共伊講：安啦！遮个問題毋免操煩，只要先互囡仔對閩南語產生興趣，自然會當引起學習个動機。為著欲互咱个讀冊囡仔甲意上閩南語課，阮除了十八般武藝攏招展，嘛定定會設計一寡仔較趣味个教材，親像…布袋戲、湊陣扮家伙仔、臆台語謎猜、講古、唱童謠、念台語詩、介紹臺灣俗諺、盤喙錦(繞口令)…等等。

　　即嘛就為大家介紹一首盤喙錦。「樹頂一隻猴，樹跤一隻狗，猴跋落來壓著狗，猴走狗嘛走，毋知是猴驚狗？抑是狗驚猴？」教這段盤喙錦一來互一、二年仔學生練喙舌，二來互三、四、五年學生知影閩南語有八種聲調（現有七種 ）。阮教學生：猴是用五支腫頭仔爬樹仔，就共伊記第五聲調。狗佇樹仔腳兩蕊目睭金金相，就共伊記第二聲調。按呢，趣味擱好記，輕輕鬆鬆就學著二種聲調。

　　閩南語實在真趣味，即嘛我來出謎猜，互恁臆看覓。「一陣鴨仔白蒼蒼，兩支竹篙趕入孔」。「樹頂一塊碗，雨來沃袂滿」。……答案「食飯」／「鳥仔岫」。

下面這段每一題攏有兩種意思，恁甘看會出來？

１、有一個醫生，逐工醫施百外人，青瞑个來…扛去。跛跤个來…行去。曲痀个來…直去。恁講伊有gau2無？
２、阿仁去剃頭店，頭家問伊欲修面無？阿仁講：「毋修欲留咧好看」。恁講伊到底是欲修面無？

看到遮，毋知恁對閩南語有產生興趣無？老實講一禮拜一節課欲教的物件總是有限，阮希望小朋友會當定定用閩南語，揣厝內阿爸、阿母、抑是阿公、阿媽開講咧，講久自然就會滑溜，一家人作伙唱台灣歌、臆謎猜，相信一定會互咱个家庭，充滿歡喜个氣氛。最後，歡迎大家湊陣來學趣味个閩南語。